Leioako kanpuseko vending makinetako prezioak igo egin dituzte azken hilabetean

ERREDAKZIOA

Leioako kanpuseko fakultateetako kafe, edari eta jateko makinetako prezioak igo egin dituzte azken hilabete honetan. Prezioen igoera 5 zentimokoa izan da. Ikasleek euren desadostasuna adierazi dute jarritako prezio berriak neurriz kapokoak iruditu zaizkielako.

Gai honi buruzko informazio eta baliabide gehiago izateko sar zaitez gure Tumblr profilean.

Bertso ekitaldiak ospatuko dira datorren asteburuan Tolosan

Antton TELLERIA

Astebukaera honetan, bertsogintzaz gozatzeko parada izango dute tolosarrek. Udazkenari hasiera eman asmoz Tolosako elkarte ezberdinek urtero antolatzen dituzte bertso ekitaldiak eta aurtengoan asteburu berean egokitu dira.

Batetik, ostiral gauean, Xabier Amuriza bertsolariak Xalbadorren bertsoak errezitatuko ditu, “Xalbador, bat bateko miralukua” ekitaldi berezian. Amurizak bertsolari zaharraren poesiak azaldu eta ulertaraziko dizkie Tolosako Lizardi elkartean bilduko diren guztiei, Galtzaundi kultur elkarteak antolatu duen ekitaldian.

Bestetik, larunbat gauean Zerkausian bertso afaria izango da, Amets Arzallus, Martin Alaia eta Iker Zubeldiaren eskutik. Udaberri dantza taldeak prestatu du emanaldia, taldearen 55. urteurrena ospatu asmoz.

Azkenik, gau berean, Julio Soto, Jon Maia eta Andoni Egaña bertsolariek Iurre Kirol Kultura eta Gastronomia elkarten ospatuko den afaria girotuko dute.

Aitzealdenk! 02 saio arrakastatsua izan da aurten ere

Lorea SEGUROLA

Aurten Azpeitiko udalak bigarren aldiz antolatu du  Aitzealdenk! jaialdia, eta giro ederra izan da bertan. Bi egunean sei musika talde desberdinez gozatzeko aukera izan da. Zuzeneko kontzertuen alde egitea izan da egitasmoaren helburua. Urriaren 19an hasi ziren kontzertuak; Moby Dick, Anai-Arrebak eta Grises taldeek eman zioten hasiera ekitaldiari. Hurrengo egunean Ama Say eta Lisabo taldeek jo zuten,  eta jaialdia giro onean amaitzeko Dj Makala musika jartze lanetan ibili zen.

Ekitaldia Sanagustin Kulturgunean izan zen. Lehen egunean 150 pertsona inguru hurbildu ziren bertara, eta bigarrengoan beste hainbeste. Sarrerak hamar euro balio zituen, bai ostiralean eta baita larunbatean ere.

Ama Say talde bizkaitarrak Euskal Herrian eman zuen azken kontzertua izan zen atzokoa. Hilaren 27an Bartzelonan joko du, eta hori izango da bere birako azkena izango da.

The Rolling Stones taldeak lau kontzertu eskainiko ditu haien 50. urteurrena ospatzeko

Daniel TAPIA

Bost urteko geldialdiaren ostean, The Rolling Stones taldea agertokietara itzuliko da aurten haien 50. urteurrena ospatzeko. Mick Jagger, Keith Richards, Charlie Watts eta Ronnie Woodek osatzen duten musika-taldeak soilik lau kontzertu eskainiko ditu “50 & counting...” izena duen biran.

Estatu Batuetako Billboard aldizkariak argitaratu zuenez, britainiar taldeak azaroaren 25 eta 29an Londreseko O2 Arenan eskainiko ditu bere lehen bi zuzenekoak, eta beste biak abenduaren 13 eta 15ean Newarkeko (New Jersey) Prudential Centerrean.

Taldearen jarraitzaile sutsuentzako “ezuste ugari” promestu ditu Mick Jagger taldeko abeslariak bere Twitterreko profilaren bitartez. Gainerako taldekideek ere sare sozialak erabili dituzte zaleei bira berri honi buruzko informazio gehiago emateko. Hala ere, oraindik ez dira ezagutzen rock-and-rollaren erregeek kontzertuetan joko dituzten abestiak.

BOX.A-k “Pornografia” erakusketa aurkeztu du Tolosako Aranburu Jauregian

Antton TELLERIA

Joan den ostiraletik Aranburu Jauregiko hormak “Pornografia” erakusketaren lanak izango dituzte erakusgai. BOX.A kultur talde tolosarrak aurkeztutako lana da, sexuaren inguruko tabuak apurtzeko aukera ematen duena.

“Chupa chupa palomita” filmean aurkitu dute BOX.A-koek erakustearako inspirazioa. Film pornografiko hura ikustean izandako gogoeta, kontraesan eta interpretazioak jorratu dituzte erakustekan. “Pornografiaren inguruko gogoeta da, jendearen hausnarketa helburu duena” aitortu zuten tolosarrek ostiraleko aurkezpenean.

Tolosako neska mutil talde kulturzalea da BOX.A. Kulturaren sustapenean ikusten zuten gabezia ase nahian sortu zen eta besteak beste eskultura, marrazketa, ikusentzunezkoak, arte eszenikoak, idazketa, diseinua eta argazkigintza lantzen dituzte.

Erakusketaren aurkezpena ostiral arratsaldeko 19:00etan hasi zen, Igelaren Banda taldearen kontzertuarekin. Bixente Martinez, Hasier Oleaga eta Amaiur Caravajille-k osaturiko taldea da, euskal kantu tradizionalen bertsioak eskaintzen dituena, jatorrizko armoniak berregituratu eta inprobisazioari ateak zabalduta.

[+] Hitza.info